Tornado

    匆匆忙忙噉又过咗一年了，一年前嘅哩个时候应该係喺回国嘅飞机度，回想一下好似只係冇几耐之前嘅事。今日广州嘅天气同英国大部分时间嘅天气好似--阴天、冷风、细雨。熟悉嘅天气令到我回忆起行走在贝尔法斯特街道上嘅感觉。

    回国一年，工作都有9个月了。仲记得啱啱入公司嘅时候睇到生产线度一台台自己公司制造嘅设备就好羡慕，当时就喺度谂：几时先有一台我参与制造嘅设备摆喺度呢？前几日哩个问题嘅答案终于出现咗了，不过唔知点解我并冇想象中咁兴奋。喺哩9个月里面感觉净係做咗台设备，其他时间做啲琐碎事已经细到记唔起身了。究竟噉样係循序渐进抑或係浪费时间呢？

    经过一个几月嘅时间，我终于攞到offer了，用咗一个多月揾工并唔算太长嘅时间，不过喺知道揾到之前未知嘅等待係几咁难过。好多谢亲朋戚友喺哩段时间嘅支持同帮助！喺哩度同大家分享下揾哩份工嘅过程。

         3.17下午接到个电话，一个男人，佢话喺网上搜到我嘅简历，觉得我几适合佢哋，问我有冇兴趣去面试，公司叫欧姆龙汽车电子，喺广州，佢仲问咗我识唔识编程、电路等等。见公司喺广州，我都好诚实噉回答佢，佢讲嘅嘢我学过但係唔精。佢话冇所谓，哩个可以到时入到公司再培训。既然人哋都噉样讲了，我就应承过去试下啰。之后佢就话将我简历畀人事等人事通知我面试时间。喺哩个电话里面我竟然唔记得问嗰个人嘅姓名，连招我去边个职位我都冇问到，冇经验啊~~~。第二日冇任何消息。第三日中午准备出门嘅时候接到个电话，人事部通知我21号1：30-2：00去面试，我顺便问番咗前日遗漏嘅2个问题，前日嘅问题补番了，但係今日又有问题遗漏，无语……。冇办法，打番去问啰。

         3.21，终于到咗面试嗰日了，晨早就要起身，准备完之后爸妈送我去福田汽车站坐车。经过2个几钟嘅车程之后到达广州，转咗部224去科学城路口喺附近食咗个叉烧饭，之后竟然揾唔到车去公司，唯有截咗部的士过去。科学城里面地方又大又荒凉，马路有唔少，不过车就唔见几部，交通相当唔方便。睇住个表跳啊跳，跳到33嘅时候终于揾到间公司了。喺门卫度登记咗攞咗张证件之后就上2楼等了，上楼之前仲要换对鞋至得。等咗一阵之后人士部嘅冯小姐就攞咗2张表我填，填完之后打电话畀我个男人李国栋先生就出咗嚟了，佢同我介绍咗下个职位同埋个职位嘅发展嘅方向，之后佢出咗2道题我做，我净答啱咗1题。做完题之后佢话揾个人嚟考我英语，心里面有啲慌，毕竟英文唔係话好好。佢揾嘅第一个人畀佢拉咗出嚟之后话自己英文唔掂，又走番入去，呵呵。之后佢又揾咗个二十几岁嘅女仔出嚟，个女仔叫我介绍下自己，于是我就开始背我精心设计嘅个人介绍了，我一边给嗰时候个女仔一边喺度睇我简历，感觉佢冇认真听。我先背完第一段，1分钟都唔够，佢突然间问我问题打断咗我，之后就开始同我展开对话。失望啊，专门设计嘅个人介绍先用咗一段，仲要唔知人哋有冇听到。之后我哋就开始用英文对话，问咗几个好简单嘅问题之后就结束，问题主要都係关于英国嘅。感觉个女仔啲英文唔係几好，我真係执到了，暗喜…。之后李生话叫部门总管嚟面试我叫我等下，等啊等啊，唔知过咗，李生出咗嚟叫我等多阵，之后就入咗去隔离个招待室。10分钟、20分钟、30分钟……120分钟，我一路坐喺度唔敢周围走，又唔敢攞嘢出嚟玩。2个几钟之后李生终于从招待室出嚟了，佢又叫我等阵，之后急急脚走入去叫个总管出嚟。过咗一阵李生同个部门主管一起嚟到，主管係个日本人，一嚟到就同我讲咗句“nice to meet you”，我即係伸出手同佢握手同埋回应番“nice to meet you”，日本人啲英文真係唔掂，呵呵。坐低之后李生同主管用日文叽里咕噜好一阵之后，主管就用英文问咗我几个非常简单嘅问题，佢仲话自己嘅英文唔掂，我嘅发音几好，哈哈，我即刻多谢佢。然后佢哋又叽里咕噜咗一阵，之后李生就同我讲，话见我喺度等咗咁耐，好有耐性，适合做研发，我汗啊！都唔知係巧合定係佢特登要我等咁耐嘅。佢仲话佢哋可以满足我嘅要求（係指我嘅工资要求，填表嘅时候有哩一项），佢话虽然我嘅要求高咗少少，但係都唔同我讲价了，考虑到我出过国投资大同埋而家物价上涨，我唔知点答佢，净係识喺度嗯嗯嗯。讲完之后佢就话叫个人事出嚟同我倾埋待遇啲嘢。之后又係冯小姐登场，同佢了解咗待遇同埋住宿信息等等啲嘢之后就走人了。落到楼下保安室交还证件准备走嘅时候保安接到个电话，原来係冯小姐，佢专程打嚟讲我知20分钟之后公司有班车开出时区，我唔赶嘅话可以坐，佢真係好人，其实哩间公司啲人个个都好nice。坐公司嘅班车又可以同啲员工倾偈获取住房信息真係一举两得。今日面试嘅经过就係咁多啦，出奇咁简单。

    最后再次多谢我嘅亲朋戚友，仲有李生发现咗我！

今次嘅旅程从10月17号开始将持续7日，之所以17号先至去旅游係因为有一个graduate fair喺其中一个目的地glasgow，旅行之余又可以去参加哩个fair。

17号5：50am嘅时候ryan敲我门同我讲五点十个字了喎，我仲以为係五点十分，于是我同佢讲仲早啊，之后又瞓番落去。我本身set个闹钟就係5：15嘅，所以5：10对我嚟讲梗係仲早啦。过咗一阵之后我爬起身一啲时间，已经5：52am了，我即刻意识到我听错咗了，于是即刻起身刷牙洗面，好彩我速度都算快，喺约好嘅时间6：00am  join埋佢哋一起出发，不过早餐就嚟唔切食了。于是天未光我哋一行三人就向车站出发坐巴士去机场了。到达glasgow机场大概係9：00am，个fair係11：00am先开始，于是我哋就喺市区行咗下同埋喺george square隔离嘅burghking食咗个早餐加午餐啦。之后我哋去george广场行咗阵，个广场有好多白鸽同埋雕像，啲雕像头顶都好多白色嘅物体（呵呵）。之后我哋就去university of strathclyde准备参加fair，点知我哋揾唔到个埞，问咗人先知原来唔係喺大学里面，係喺另外一个地方，学校附近有免费接送巴士，于是我啲按听得半明半唔明嘅指示去揾巴士坐，好彩都畀我啲揾到。原来个fair係喺会展度举行，喺门口填完注册表格之后我哋就进入会场。第一次参加啲噉嘅fair，有啲不知所措，大部分时间都係john同啲工作人员讲，我哋喺度听。全部人都係畀咗啲资料我哋叫我哋上网睇，就算有一部分会同我哋讲解但係最后都会补充叫我哋上网睇。3：00pm左右我哋就离开咗会场，本来想去展馆附近嘅一个景点观光塔睇下嘅，不过因为大风，观光塔唔开放，于是我哋就去咗食晚餐了。喺一间中餐馆食完buffet之后john同ryan送咗我去市中心附近揾地方住，之后佢哋就去机场坐飞机番去了，而我就要开始一个人嘅旅程了。揾咗间B&B放低咗啲行李之后就出去行咗下，街度已经冇乜人了，商店大部分亦都关咗，仍然营业嘅都係啲便利店之类嘅嘢，而且好多仲係阿差开嘅。行咗1个钟左右就番咗去了，冲咗个凉之后睇咗阵电视，见冇乜搞咗就瞓了。

第二日8点几起咗身，食咗个免费嘅scottish早餐之后就开始今日嘅旅程了。第一站亦都係glasgow嘅最后一站就係 glasgow cathedral。个教堂同其他教堂差唔多，都係里面混混暗暗，彩色玻璃。glasgow嘅景点实在係唔多，于是参观完教堂之后我就坐火车去edinburgh了。到达edinburgh已经12点几了，从火车站楼梯行上大街就睇到好多人，果然係大城市。去隔离个information centre办咗张edinburgh pass之后就去edinburgh castle参观。个城堡係起喺山上面嘅，所以喺从外面睇好有气势同埋喺城堡里面可以俯瞰成个城市。至于城堡里面感觉并冇咩好睇，了解下城堡皇帝等等啲历史，参观下军事博物馆，睇下个用于纪念用途嘅教堂。反而係广场等开阔嘅地方可以俯瞰到成个城市更加吸引。虽然我感觉个城堡并唔点样，但係佢不愧係一个出名嘅景点，因为有好多游客。参观完城堡之后就去咗事先book好间B&B

放低行李跟住就去食饭了。揾咗间中餐馆食点心，点咗4个就已经十几镑了，以前喺深圳爸妈话去饮茶都冇咩冲动，觉得不如喺屋企食粥，而家3镑一笼点心都走去食，自己谂起都觉得有啲可笑。食完嘢就番B&B休息了，因为好攰而且出面冇咩好行，酒吧又唔想去。番到去又係冲咗个凉睇咗阵电视就瞓了。

19号，今日将会去edinbugh pass里面嘅景点。第一站亦都係今日我觉得最精彩嘅一个地方— camera obscura。哩个景点就喺城堡隔离，有5层，第一层係入口，售票处同商店。第二层有好多画，画中藏画或者藏字嗰种画，网上都可以睇到。第三层有好多镜等等嘅嘢，组成好多有趣嘅光学现象。第四层就有啲3D嘅画，从唔同角度睇可以睇到唔同嘅嘢。第五层係最精彩嘅一层，喺一间暗室里面有个装置可以将edinburgh周围嘅嘢投影到一个圆台上，古时可以用来指挥作战。哩个投影係实时，你可以睇到啲车同人喺街度移动。之后我就去咗附近另外一个景点—3D loch ness experience，其实就係睇一部关于尼斯湖水怪嘅3D电影。入到去之后得我一个观众，心谂咪要等多啲人先可以开场，点知个管理员即刻就播电影了。睇咗几分钟之后想走，但係又唔好意思，终于十几分钟之后忍唔住了，问个管理员可唔可以走啊，佢话可以，即刻鸡噉脚走，我而家明白点解冇人了。之后我就走咗去national museums of scotland，兜咗一阵之后觉得冇咩意思就去咗museum里面嘅special exhibition gallery，最近展紧嘅係picasso嘅作品，个展览名叫picasso : fired with passion。虽然我唔识欣赏艺术，但係都听过毕加索个大名啦，梗係唔可以错过哩个机会啦。一入到展厅睇到嘅就係介绍毕加索生平嘅屏风，后面就係佢啲作品。兜咗一圈我就出番嚟了，先用咗十几分钟，入去嘅时候个检票人员仲提醒我张票今日内都有效，我可以出去食完嘢再入番去。出咗博物馆之后我就去咗dynamic earth，哩个景点係2007先开嘅，就喺holyrood王宫隔离。入到一个椭圆形嘅幕之后就係吃嘢同售票嘅地方，游览嘅内容都喺地下。哩个景点其实主要係用现代化嘅手段介绍地球嘅形成同埋形成之后所经历嘅嘢。成个tour都几无聊，我觉得哩个地方比较适合中小学生。dynamic earth里面最精彩嘅部分莫过于最后喺天幕影院度去做题目了。啲题目係关于地球水资源嘅，根据观众选择嘅答案，将会有唔同嘅结果，我哋最后嘅结果係英国缺水，哈哈。再之后我就去咗edinburgh dungeon，哩个景点就喺waverley station隔离，以整蛊作怪为卖点，连个厕所都整蛊作怪，用witch同demon嚟分男女。入到去之后就开始黑“孖孖”了，成个tour都係喺哩种噉嘅气氛下进行。第一个地方喺最有趣嘅，个tour guide讲我哋带到一个好多镜嘅暗室里面，入到去之后好难分清你眼前嘅係一条路定係一块镜，大家都伸出对手边摸边行，都兜咗好一阵我哋先行出哩嘅暗室。之后就係佢哋使出各种方法去吓我哋啦，例如劏尸体，突然冲出嚟等等。本来仲以为哩个係一个玩机动游戏嘅景点，原来唔係，最大把就係最后坐咗佢个船仔慢悠悠噉穿过一条隧道。哩个tour完咗之后都係时间去参加事先book好嘅the vaults tour了。我哋跟住个tour guide嚟到blair street，佢打开咗个门之后，呈现喺我哋眼前嘅就係一条通道，周围係啲好旧嘅石头。沿煮条通道行，落咗楼梯之后就嚟到地窖了，个地窖係18世纪建造嘅，位于south bridge下面，当时用嚟收藏威士忌等用黄金都换唔到嘅嘢同埋进行合法与非法嘅交易。参加完哩个tour之后都已经5：00pm，啲景点都关晒了，而我book咗今晚8：30嘅murder and mystery tour,所以我打算喺附近揾埞食嘢，无意中畀我发现一间中餐馆有buffet食，于是就走咗去食中餐buffet啦。食完之后到处乱逛打发时间……。8：30去到位于high street嘅集合地点，等咗一阵之后有2个扮鬼嘅人过嚟同我哋收票，之后其中一个吸血鬼打扮嘅人就带我哋开始个tour。个吸血鬼带我哋喺街度走嚟走去，喺某啲地点停低同我哋讲古仔，咩刑场、交易人体器官嘅地方啊等等，间唔中佢个助手仲扮鬼扮马冲出嚟吓人，因为我冇行过喺最前面，所以我都喺睇人哋被吓。个tour完咗之后就番B&B休息，准备听日个highland experience。

20号早上，晨早就起身去highland experience位于high street嘅集合点。因为太早，B&B未开始提供早餐，所以饮咗杯奶茶就走咗了。去到集合点车仲未嚟，见附近间subway开咗于是就去买咗个包食，个包就食完嘅时候车嚟咗了，司机落车同我哋握手，我手忙脚乱噉同佢握咗下手之后快快脆啃晒个包，之后就上咗车了。确定大家都准备好之后司机就启动引擎，高地之旅就开始了。个司机叫chris，苏格兰人，非常吹得，一路上佢就同我哋介绍苏格兰同讲关于苏格兰嘅古仔或者历史。同团嘅仲有2个荷兰人，2个澳大利亚嘅公公婆婆，哩2个公公婆婆唔简单啊，有几唔简单？迟啲先讲。仲有就係4个学校派过嚟学3星期英文嘅西班牙学生。唔记得车开咗几耐先到咗第一个停靠嘅地方，净係记得停靠个地方得几间商店，有一个卖士多啤梨嘅人同埋有一只高地牛（hamish），啲士多啤梨比市区买嘅甜，我买咗一盒同大家食。停咗十几分钟之后我哋又上番车继续旅程了。一路上睇到嘅都係山，间唔中会有湖、小溪同埋小瀑布。途中停靠咗几多次已经唔记得了，每次停靠都会有古仔或者历史听， five sisters hill嘅传说、 maclean同campbell嘅战斗等等。好彩哩几日都出太阳，可以睇到阳光穿透云层射落地下嘅美丽一幕，chiris话佢哋称之为hand of god。傍晚时分我哋就差唔多到达今晚住宿嘅小镇kyleakin。哩个小镇喺isle of skye上面，座落于skye同主岛连接嗰条桥隔离，规模相当细，连餐厅都唔多间。因为我哋订住嘅地方都唔同，所以chris喺唔同嘅地方放低我哋，至于我就同4个西班牙人住同一个hostel不过就冇同佢哋同房，同我同房嘅喺3个加拿大嚟旅游嘅人。放低啲嘢之后唞咗阵就去chris推荐间餐厅食嘢，去到餐厅见到chris同2个荷兰人已经喺度饮嘢了，我围埋过去之后同佢哋倾咗一阵偈之后大家就叫咗嘢食了。好耐冇食海鲜，本来想食，但係唔好睇哩度周围係海，冇乜海鲜食咋。于是点咗个不如我自己整嘅咖喱饭o(∩_∩)o…。食完嘢之后大家都喺度等冇人知今晚几时开始嘅英格兰对南非嘅rugby。等待嘅过程中我哋走咗去玩飞镖，佢哋个个都玩得下，得我係乱咁飞，后来喺佢哋指导之下都算係有所进步。成个游戏最成功嘅地方我谂都係我冇飞中人了，哈哈。唔知几时rugby比赛差唔多开始了，大家都揾位坐好等比赛开始。经过一轮推撞之后英格兰唔知以几多对几多输咗畀南非，大部分都表现得几开心，呵呵。比赛完咗之后佢哋继续留低饮酒，我就自己走咗先了。第一日嘅高地之旅就噉结束咗了。

21号早上，chris喺9点几接齐我哋之后就开始今日嘅环skye一日游。skye哩度都係啲山山水水，不过平原比主岛多。沿住马路嚟到skye嘅首府portree，虽然係首府，但係规模并唔大，似一个小镇。街道上冇乜人，可能因为星期日大部分店铺都冇开门。不过噉样一个小镇就係应该咁宁静，漫步喺街道上有一种好舒服嘅感觉。停留咗20分钟之后我哋就继续驱车北上了，上到skye最北嘅时候有3间茅草搭起嘅musesum，不过当日冇开放，所以只係喺外面睇咗下。之后我哋就落番嚟，去咗dunvegan，喺嗰度食咗午餐同埋参观咗chris极力推荐嘅dunvegan castle，感觉有啲失望，反而城堡周围嘅花园更加吸引。个花园都好大，之后我哋就揸车离开咗skye番番主岛了。晚上我哋就喺loch ness隔离叫drumnadrochit嘅小镇过夜。今次我同4个西班牙人一间房，感觉安全好多，毕竟大家一个团。我自己走出去食完一个好难食嘅晚饭番嚟之后啲西班牙人叫我同佢哋一起玩牌，佢哋教咗我2种玩法，我就教咗佢哋玩冚棉胎，玩得都几激烈，哈哈。之后我哋仲玩埋百万富翁，不过就比较无聊。玩到11点几我哋就去瞓了。

22号，highland experience嘅最后一日。从drumnadrochit出发，沿住loch ness向高地首府inverness出发，inver係河口嘅意思，ness就係传说中有水怪嘅湖名啦，iverness就係噉嚟啦。中途喺尼斯湖旁边停留咗一阵，chris同我哋讲咗件事，佢话好耐之前，有一个电视台喺尼斯湖度放咗舊木头，用绳绑住，喺岸上面有人控制哩舊木头。之后电视台啲人揾咗啲游客嚟尼斯湖，佢哋将舊木头拉咗起身，电视台啲人就嗌：嗰个係咩啊。舊木头过咗一阵当然就要消失啦，木头消失之后电视台嘅人叫游客将佢哋睇到嘅嘢画出嚟，佢哋画出嚟嘅嘢有带角嘅怪物，有喷火嘅怪物等等。停留咗二十几分钟之后我哋就继续向inverness出发。Inverness度有个战场，係1746年4月16日jacobite army同government army作战嘅地方。而家哩个地方就係一大片草地，地下埋咗好多战死嘅人。之后我啲去咗战场附近一个有几千年历史嘅古石堆，想了解啲石堆同石堆嘅介绍就睇相啦。再之后就係开始南下番edinburgh了，中午嘅时候喺一个不知名小镇停咗下食嘢。嗰午餐係同2嘅澳洲公公婆婆一起食嘅，最后仲係佢哋请我食嘅。哩2个公公婆婆有5个女7个孙，1个女喺abu dhabi，1个女喺伦敦，佢哋之前喺abu dhabi去咗伦敦，然后再去edinburgh参加咗哩个highland experience，之后佢哋会番伦敦，再去iceland睇一个concert，跟住番abu dhabi后再去egypt，最后番澳洲，真係一个漫长嘅旅程。食完饭之后我哋继续南下，到达edinburgh之前嘅最后一个停靠嘅地方，我觉得係成个highland experience甚至乎喺哩次旅行最精彩嘅部分了。嗰个地方係一个公园，叫the hermitage。里面啲树听讲係一个国王用纸包住啲种子之后摆落大炮度发射而种出嚟嘅，已经有两百几年嘅历史了。我哋沿住公园里面条河行咗十几分钟就见到一条桥，喺桥隔离冇几远有间屋子，叫ossian’s hall。推开度门之后见到正对住门嘅墙壁度有度白色嘅门，门上面有幅画（又唔係画係一张纸度嗰种画，唔知点叫，总之上面有图案），右边有个把手，拉动把手之后白色嘅门就会打开。chris拉开度门嘅时候我第一感觉就係中国古装片啲密室，哈哈。穿过白色门之后入到另一间房，左右两边都係白色门上面嗰种画，而正对白色门嘅方向係一度玻璃门，玻璃门外面係个阳台噉嘅地方，阳台下面係一条河。就喺係哩个阳台，哩条河，我睇到三文鱼逆流游番去出生地！！！虽然净係睇到2次三文鱼嘅跳跃，不过都已经满足了，可惜嘅係捕捉唔到嗰瞬间（更多内容参考http://www.perthshire.co.uk/index.asp?pg=362）。真係好想喺嗰度停留耐啲，不过跟住一团人，唔可以自把自为。离开个公园之后过咗2个钟左右嘅车程就番到high street，大家互相握手告别之后散咗了，好彩我哋之前都有互留email地址，以后可以联系，希望有机会再见到佢哋啦。喺附近食咗嘢之后就去book好嗰间B&B休息了。

23号，今次旅行嘅最后一日，今日行程唔会好似前几日咁紧凑，因为剩低嘅景点都唔多了。食完早餐之后就去咗calton hill，哩座山同edinburgh castle遥遥相望，喺哩座上上面基本可以俯瞰成个edinburgh，景观非常好。山顶有座纪念碑叫nelson monument同埋一座好似雅典卫城噉样嘅建筑。山顶落嚟之后我就去咗参观palace of holyroodhouse，因为哩个王宫而家仍然被王室使用，所以里面啲嘢大部分都保持原貌，有啲与贵族同在嘅感觉。皇宫出面有个教堂遗迹，教堂顶部已经坍塌，望住个遗迹有少少凄凉嘅感觉。离开王宫之后就唔知仲有咩地方好去了，因为计划好嘅景点都去晒了。见已经係中午，于是打算边食嘢边谂。唔知食咩好，于是买咗个三文治坐喺west princes street gardens里面食，正对嘅就係edinburgh castle。食完之后就去咗royal botanic garden逛咗一圈，之后就番市中心准备坐车去机场。见仲有2、3个钟于是喺west princes street gardens坐咗阵同行咗下edinburgh castle座山之后就去机场了。

苏格兰7日嘅行程就噉结束咗了，多谢上天赐我7日好天气，最后要为被拒签嘅欧洲签证默哀同时诅咒申根政策。